u
اسمعوا اغنية ضاقت بيك ل صابر الرباعي
بتعبر عن حالتي الفترة ديشاركوني

يا وردتي

يحبني لا يحبني يحبني لا يحبني


يا وردتي يحبني


فإنني احبه



سألته أجابني ....... أحبك كثيراً ........ صدقته



لكنك يا وردتي اوراقكي زوجية


من قال إن الورد أصدق من حبيبي


يحبني كثيراً



يا وردتي أتذكري يوم أن هداكي لي



ألم يقل يحبني


سمِعتِه يحبني يحبني كثيراً



يا وردتي لو شئت أن أجعلك تقولي انه يحبني



لكنت قلت انا



لا يحبني يحبني


ولصرتما كلاكما تغنيان لي


يحبني كثيراً


احبه يحبني واننا نحبك



يا وردة لمستها يدانا

رمضان مبارك

كل سنة و انتو طيبيين
و يجعله شهر خير علينا جميعا
و رمضان الجاي
كل واحد محقق كل أحلامه
أنا مقصرة و الله و مبكتبش كتير بس
مشاغل
وميرسي لكل اللي سألوا عن جديدي و يارب اكون عند حسن ظنكو
تحياتي

اللهجة النتية

كل واحد فينا بيتكلم اللهجة الخاصة ببلده يعني اهل مصر بيتكلموا اللهجة المصرية و هي اكتر اللهجات العربية المنتشرة واللي بيفهمها معظم العرب لو مش كلهم
واللي من الشام يعني أهل سوريا و لبنان و الأردن و فلسطين كل واحد فيهم ليه لهجتوا الخاصة و هي مفهموة نسبيا عند الكل
و شمال افريقيا يعني الجزائر و المغرب و تونس و ليبيا ليهم لهجتهم الخاصة و هي بصراحة من اصعب اللهجات نظرا لسرعتهم في الكلام
ووجود مصطلحات اجنبية خصوصا فرنسية بدل كلمات عربية كتير
واهل الخليج بيتكلموا خليجي وكل منطقة ليها لهجتها الخاصة يعني اللي في السعودية مبيتكلومش زي اهل البحرين و كل لهجة فيها مصطلحاتها الخاصة
يعني لو مسكنا كلمة وحدة نلاقيلها مقابل في كل لهجة زي كلمة كتير
بالسعودي....... وايد / مرة /حيل حسب المدينة يعني كمان بين المدن في اختلاف في اللهجات
بالعراقي ......... هوايا
بالليبي ...... هلبا
بالجزائري .......... ياسر
بالمغربي ....... بالزاف
بالتونسي ....... برشا
بالمصري ...... كتير / أوي
بالشامي ........ كتير
بس في عصر النت مفيش حد محتفظ بلهجته كله بقى بيتكلم لهجة نتية
وهي خليط من كل اللهجات اللي فاتت يعني المحادثة بتبتدي ب - هلا وغلا * خليجي *
مرورا ب ازيك و عامل ايه وحشتني * مصري *
انتهاءاُ ب الله يسهل عليك مع السلامة * فلسطيني *
بالاضافة لكتير من المصطلحات المشتركة اللي جت من النت او بالاحرى اختصار لكلمات اجنبية
زي
برب
تيت
باك
سي يو
باي
و حاجات كتير
حبايبي المدونين سي يو في نيو بوست و حتوحشوني برشا برشا و هالله هالله بروحكم وفي امان الله يا تؤبروني

البيت بيتك

يظهر أن السفير المصري في الكيان الصهيوني " ياسر رضا " متأثر جدا بمحمود سعد و برنامجه البيت بيتك
علشان كدة سيادته دعا نتنياهو يشاركهم في احتفالات ثورة يوليو و ادى له فرصة يعبر عن مشاعره و بصراحة لا و النتن ما قصرش شكر في مصر و في حكومتها وميشكرش ليه مش حكومتها برضوا اللي من عندها هددت الست ليفني بحرب على غزة و محدش قالها يا ست عيب اختشي دول مهمن كان اخواتنا
ولا هي ايه العبارة معدش في اخوات و لا معدش في دم دة بقى زمن العجايب زمن بنرحب فيه بعدونا اللي قتل ولادنا
هو السفير دة معندوش خليفةزي ما بيقول السقا عن حرب 56 ولا 73 مشفش الاسرى المصريين بيدفنوا و هما لسة عايشين مشفش الشهداء في غزة اللي لسة دمهم منشفش ولا دي أوامر عليا جتله من هناك علشان يستضيفهم يشاركوا فرحة الاحتفال بالثورة
الثورة اللي المفروض نعملها احنا عليه هو و امثاله
بس هيجي اليوم اللي ناخده في حقنا و نحتفل في نفس المكان من ارضنا بنصر الامة واكيد مش محتاجين دة و امثاله يشاركونا فرحة النصر لان نصرنا في بعده عننا و عن قضيتنا
والبيت بيتنا

كدة رضا

لما تحب حد من قلبك و اول واحد يغدر بيك وقت الشدة يبقى هو كدة رضا
لما تعيش تحلم و تكبر و أحلامك بدل ما تكبر معاك تصغر لحد ما تختفي كدة رضا
لما تكون لقمة العيش هي هدفك الأول وعايش علشان توفرها و بس كدة رضا
لما تتعلم وتاخد شهادة و تحطها جنبك ومتشتغلش بيها كدة رضا
لما تشتغل في حاجة مبتفهمهاش و مبتحبهاش كدة رضا
لما تقعد مع ناس بيضحكوا في وشك و تضحك في وشهم ومحدش فيكو طايق التاني كدة رضا
لما تبقى مخنوق ومش لاقي حد يسمعك وتقرب تنفجر كدة رضا
لما انت بتسمع مشكلة لحدا وانت بتسمع بودانك بس كدة رضا
لما تشوف احمد حلمي عامل 3 شخصيات في فيلم واحد كدة رضا

صوتك

الصوت يا جماعة بقى مشكلة في الزمن عشان الناس اللي بتتصل
بالغلط يعني لو صوتك حلو متردش
يعني يتعلقوا في صوتك و يبقوا هيموتوا و يعرفوا مين صاحب الصوت دة
دة حتى عيب في حقك
دول يعيني بيمشوا في الشارع يفكروا فاللحظة اللي ختعبريهم فيها
اللي بيخليني اقول كدة
موقف حصلي من سنة تقريبا
رن الموبايل نمرة معرفهاش برد
رد اخينا و بيقولي مش دي نمرة مش عارف مين
قولتله لأ غلطان قالي تيا انا اسف جدا
وقلنا خلاص عادي بتحصل في احسن العائلات
بعد كم يوم
برد عالموبايل
الو
اهلا
ازيك
عفوا مين حضرتك
انت تعرفني
وكاني بخزن كل الاصوات اللي بسمعها
حد قاله اني عندي جهاز تسجيل في دماغي
رد اخينا و كانه سؤال غريب مين حضرتك دة ايه
انا اللي اتصلت بيكي من كم يوم بالغلط
سبحان الله
معنديش حق اني انسى سيادته دة لسة مكلمني من كم يوم
والنبي لو زعل يبقى ليه حق
معقولة دي
بقوله والمطلوب يعني
قالي قبل ما تقفلي هقولك كم كلمة بس
انا سكت قلت اسمع و اشوف اخرتها ايه
قالي انا من لما سمعت صوتك وانت شاغلة تفكيري صوتك ملائكي
اصله سمع صوتهم قبل كدة كان بيتصل على شيطان صاحبه و اتلخبط في مقدمة الرقم
ومن الاخر يعني
انا كنت بتمشى لوحدي و جيتي في بالي وحبيت اسمع صوتك
اسفة جدا مبكلمش حد وعن ازنك الادان بيادن وهصلي العصر
ويا ريت تنسى نمرتي
وقفلت
لقيته بيتصل بعد شوية بيقولي نسيت اقولك حاجة
انا اسمي
ادوارد
واعملك ايه يعني
بيقولي مفهمتيش حاجة يعني
انا مسيحي
بس كلنا بنعرف ربنا صح ولا لأ
قولتله لو سمحت يا ريت متكلمنيش تاني
لو في زوء
قالي انا اسف جدا و دة حقك
الكلام دة بقى قبل رمضان
ليلة ما اعلنوا رمضان
كانت اول مسج وصلتني تهنئة بالشهر الكريم من سيادته
وبقى على معاد السحور يرنلي
يبعتلي مسج قومي اتسحري
فيه الخير
المشكلة مش في ديانته على عيني و راسي مع انها مشكلة
بالنسبة لبنت مسلمة
بس الاسلوب دة مبحبوش
ايه يعني عجبك صوت وحدة
تبقى خلاص حتحبها
نفسي اعرف هما بيضيعوا وقتهم وفلوسهم في الحاجات دي ليه
ومواقف كتير من دي
واحد مرة اتصل و بعد ما طلعت النمرة غلط زي كل مرة
بيتص بفتح خط علشان اخسره ومبتكلمش
يفضل تيب كلمة وحدة سمعيني صوتك بس
تيب مش عايزة تتكلمي اتنفسي
كفاية علية اسمع نفسك
( نسيت اقوله ان نفسي حلو في الاكل )
لو جات على الناس دول و بس كانت بسيطة
بس مرة بتصل على الاستعلامات اخد نمرة وحدة صاحبتي
موظف الاستعلامات
عاملي تحقيق
الرقم اللي انت عاوزاه دة لصاحبتك
طيب انت عندك كم سنة
وانا اقوله بس انا عايزة الرقم لو سمحت
تيب انا اسمي محمد ممكن تديني نمرة موبايلك
انا هخرج دلوقتي من الشغل و اكلمك
يا عم محمد عيب
انا اقدر اخد الرقم اللي اتصلتي منه
دة اكيد رقم بيتكو
بس انا عايز انت اللي تردي
اصلك متعرفيش جرالي ايه اما سمعت صوتك
انا ببقى عايزة اقفل من الاول
بس بحب اشوف الكدب هيوصلهم لفين
بس حاليا مبقتش ارد على ارقام غريبة
واللي عايزني ضروري يبعتلي مسج يقولي هو مين قولولي بقى رأيكم في المعاكسات بتاعت التليفونات دي؟